লোকসভাত হুলস্থূলীয়া পৰিৱেশ, পিএনবি কেলেংকাৰী সন্দৰ্ভত সংসদ চৌহদত প্ৰতিবাদ কংগ্ৰেছৰ

NNO WEB BUREAU's picture
By: NNO WEB BUREAU
March 6, 2018 - 12:55

ডিজিটেল ডেস্কঃ পিএনবি কাণ্ড, এছএছচি পেপাৰ ফাদিল আৰু অন্ধ্ৰপ্ৰদেশ ৰাজ্যক বিশেষ ৰাজ্যৰ স্বীকৃতি বিচৰাক লৈ বিৰোধীয়ে মঙলবাৰে সদন উত্তপ্ত কৰি তোলে৷ যাৰ ফলত সদন স্থগিত ৰাখিব লগা হয় লোকসভাৰ অধ্যক্ষই৷ সংসদীয় বাজেট অধিৱেশনৰ দ্বিতীয় পৰ্যায়তো বিৰোধীয়ে উক্ত বিষয়সমূহক লৈ পৰিস্থিতি উত্তাল কৰি তোলা দেখা যায়৷

 

 

উল্লেখ্য যে, সোমবাৰেও কংগ্ৰেছ দলে পিএনবি কেলেংকাৰীৰ বিষয়টোক লৈ দুয়োখন সদনতে হুলস্থুলীয়া পৰিৱেশৰ সৃষ্টি কৰে৷ মঙলবাৰে অধিৱেশনৰ প্ৰথম পৰ্যায়ত ৰাহুল গান্ধীৰ উপস্থিতিত দলটোৰ সাংসদসকলে বিৰোধ প্ৰদৰ্শণ কৰে৷ জানিব পৰা মতে মঙলবাৰে লোকসভাত পঞ্জাৱ নেচনেল বেংকৰ ঘটনাটোক লৈ চলি থকা বাদ-বিবাদ সমূহ লোকসভাত শেষ কৰিবৰ বাবে আলোচনা চলিছিল৷ সোমবাৰে লোকসভাৰ বিজনেছ এডভাইজৰী কমিটিৰ বৈঠকত সকলো দলৰ সন্মতিক্ৰমে পিএনবি কাণ্ডৰ ওপৰত ৪ঘণ্টা আলোচনা কৰা হ’ব বুলি সিদ্ধান্ত গ্ৰহণ কৰা হৈছিল৷

কিন্তু বিৰোধী দলে ইয়াৰ ওপৰত মংগলবাৰে পুৱাই শেষ সিদ্ধান্ত লয়৷ ৰাজ্যসভাত পিএনবি সমস্যাটোৰ ওপৰত আলোচনা কৰিবলৈ চৰকাৰ মান্তি হয় যদিও বিৰোধীয়ে নিয়ম ২৬৬ অনুযায়ী ভোটিঙৰ দাবী তোলে৷ অৱশ্যে সভাপতিয়ে বিপক্ষৰ এই দাবী বাতিল কৰে৷ ইয়াৰোপৰি এছএছচি পেপাৰ ফাদিল হোৱা বিষয়টোও মঙলবাৰে সদনত উত্থাপিত হয়৷ ৰাষ্ট্ৰীয় জনতা দলৰ সাংসদ জয় প্ৰকাশ যাদৱে লোকসভাৰ মজিয়াত এছএছচি পেপাৰ ফাদিল বিষয়টো স্থগিত ৰখাৰ বাবে নটিছ জাৰি কৰিছে৷

লগতে জয় প্ৰকাশ যাদৱে শূণ্য কালতো এই বিষয়টো উত্থাপন কৰা হ’ব বুলি কয়৷ উল্লেখ্য যে এছএছচি পেপাৰ ফাদিল বিষয়টোৰ ওপৰত ৮ দিন ধৰি সমগ্ৰ দেশৰে ছাত্ৰ-ছাত্ৰীয়ে যন্তৰ-মন্তৰত প্ৰতিবাদ কৰি আহিছে৷ প্ৰতিবাদকাৰীসকলে চৰকাৰৰ সিদ্ধান্ত অবিহনে কোনো লিখিত আশ্বাস পালেও প্ৰতিবাদ কাৰ্যসূচী ভংগ নকৰে বুলি জনায়৷ ইয়াৰোপৰি টিডিপিৰ সাংসদে অন্ধ্ৰপ্ৰদেশক বিশেষ ৰাজ্যৰ স্বীকৃতি দিবৰ বাবে কৰি অহা দাবীক লৈও মঙলবাৰে সদন উত্তপ্ত হৈ পৰে৷ যাৰ বাবে সদনৰ কামকাজ স্থগিত ৰখা হয়৷