newsnextoneone.com।খেৰণি: কাৰ্বি পৰিষদৰ প্ৰাক্তন কাৰ্যবাহী সদস্য ইলিছ ইংতিপিৰ ঘৰত সংঘটিত হৈছে এক আসুৰিক কাণ্ড। কিশোৰীক গৰম পানী ঢালি নির্যাতন চলোৱাৰ বিস্ফোৰক অভিযোগ উত্থাপন হৈছে ইলিছ ইংতিপিৰ বোৱাৰীয়েকৰ বিৰুদ্ধে। কংগ্ৰেছ নেত্ৰী তথা প্ৰাক্তন কাৰ্যবাহী সদস্যৰ বোৱাৰীয়েকে শৰীৰত গৰম পানী ঢালি গুৰুতৰভাৱে আঘাত কৰিছে এগৰাকী এঘাৰ বছৰীয়া কিশোৰীক । নিৰ্যাতনৰ বলি হোৱা এই কিশোৰীজনী হৈছে পশ্চিম কাৰ্বি আংলঙৰ জিৰিকিন্দেঙৰ ৰং-ছিংৰুম গাঁৱৰ চন্দ্ৰ টেৰণৰ কন্যা মিলি টেৰণপি (১১)। অতিকৈ দুৰ্গম অঞ্চলৰ এটা দৰিদ্ৰ পৰিয়ালৰ ছোৱালী এওঁ। ইফালে যোৱা মাৰ্চ মাহত ডিফুত নি পঢ়োৱাব বুলি কৈ মিলি টেৰণপিক লৈ গৈছিল ইলিছ ইংতিপিৰ পৰিয়ালে। কিন্তু এক পৰিতাপৰ বিষয় বিদ্যালয়লৈ যাবলৈ দিয়াৰ বিপৰীতে মিলিক প্ৰায় ইলিছ ইংতিপিৰ ঘৰতে কাম কৰিবলৈ দিয়ে বুলি প্ৰকাশ কৰিছে কিশোৰীগৰাকীয়ে। এক আশ্চৰ্যজনক বিষয় যে চৰকাৰে শিশু শ্ৰমিক, শিশু নিৰ্যাতন প্ৰতিৰোধ কৰাৰ বাবে আইন প্ৰস্তুত কৰি প্ৰণয়ন কৰিছে। বিভিন্ন সময়ত হোটেল, ইটা ভাট্টা, কাৰখানৰ আদিৰ পৰা শিশু উদ্ধাৰ কৰি শিশু আশ্ৰম বা চাইল্ড লাইনত চমজাই আহিছে আৰু তেনে সময়তে এসময়ৰ এগৰাকী ৰাজনৈতিক প্ৰভাৱশালি নেত্ৰীৰ ঘৰত কণমানি কিশোৰীক নিৰ্যাতন চলোৱা ঘটনাৰ বিষয়টোক ছোচিয়েল মেডিয়াই এতিয়া সমগ্ৰ কাৰ্বি আংলঙত তোলপাৰ লাগাইছে। এই তোলপাৰৰ পাছতেই কাৰ্বি পৰিষদৰ প্ৰাক্তন কাৰ্যবাহী সদস্য ইলিছ ইংতিপিৰ ঘৰত যে বনকৰা ছোৱালী হিচাপে থকা এগৰাকী এঘাৰ বছৰীয়া কিশোৰীক অমানৱীয় ভাবে নিৰ্যাতন চলোৱা হৈছিল এই কথা স্পষ্টভকৈ পোহৰলৈ আহিছে। খোদ নিৰ্যাতনৰ বলি হোৱা কিশোৰীয়ে অসমীয়া কব নাজানি কাৰ্বি ভাষাৰে প্ৰকাশ কৰিছে যে যোৱা ২৩ ছেপ্টেম্বৰৰ দিনা ইলিছ ইংতিপিৰ ঘৰত থকা এজন কিশোৰক ইলিছ ইংতিপিৰ বোৱাৰী মিতালী ইংতিপিয়ে টেবুল চাফা কৰিবলৈ দিছিল আৰু মিলিক চাফা কৰা কামটো চাবলৈ দিছিল। কিন্তু কিছু সময়ৰ পাছত ইলিছ ইংতিপিৰ বোৱাৰী মিতালী ইংতিপিয়ে টেবুল চাফা কৰা স্থানত উপস্থিত হৈ কিশোৰদ্বয়ে কৰা কামত সন্তুষ্ট নহৈ মিলি টেৰণপীৰ ওপৰতে খং-ৰাগ উজাৰে। ইয়াৰ পাছতেই ভিতৰৰ পৰা কিশোৰীগৰাকীক গৰম পানী আনিবলৈ আদেশ দিয়ে ইলিছৰ বোৱাৰীয়েকে। আৰু সেই গৰম পানী নিৰ্দয়ী বোৱাৰীয়েকে মিলিৰ ডিঙিত ঢালি দিয়ে। ইয়াতে শান্ত নাথাকি পুনৰ আকৌ এবাৰ গৰম পানী ঢালি দিয়ে কিশোৰীগৰাকীৰ শৰীৰত ইংতিপিৰ বোৱাৰীয়েকে। লগে লগে যন্ত্ৰণাত থাকিব নোৱাৰি কিশোৰীগৰাকীয়ে নিজে ফ্ৰীজৰ পৰা শীতল পানী উলিয়াই শৰীৰৰ জ্বলা অংশত ঢালি ঠাণ্ডা কৰাৰ চেষ্টা কৰে বুলি জানিবলৈ দিয়ে মিলিয়ে। কিন্তু ইমানবোৰ ঘটনাৰ পিছতো পৰিয়ালটোৰ কোনো সদস্যই কিশোৰীগৰাকীক লগে লগে চিকিৎসা প্ৰদানৰ চেষ্টা অথবা ব্যৱস্থা গ্ৰহণ নকৰিলে। নিৰ্যাতিতা কিশোৰীৰৰ পিতৃয়ে হঠাৎ ডিফুত গৈ ঘটনা সম্পৰ্কে গম পাই লগে লগেই মিলিক নিজৰ ঘৰলৈ বুলি লৈ আহে আৰু নিজৰ অঞ্চলটোত থকা চিকিৎসালয়তে মিলিক চিকিৎসা প্ৰদান কৰে কিশোৰীগৰাকীৰ পিতৃয়ে। অৱশ্যে এই অমানৱীয় ঘটনা সম্পৰ্কে ছোচিয়েল মেডিয়াত ভাইৰেল হোৱাৰ পিছতেই ইলিছৰ পুত্ৰ লুন্সে মিলিকে নিৰ্যাতিতা কিশোৰীৰৰ ঘৰত উপস্থিত হৈ ঘটনাটোৰ সম্পৰ্কে থানাত গোচৰ ৰুজু নকৰিবলৈ আৰু আঘাতপ্ৰাপ্ত কিশোৰীগৰাকীক চিকিৎসা প্ৰদান কৰিবলৈ এক লাখ ত্ৰিশ হাজাৰ টকা দি ঘটনাক গাপ দিয়াৰ চেষ্টা কৰিছে বুলি ইতিমধ্যে বৃহত্তৰ জিৰিকিন্দেঙবাসীৰ মুখে মুখে চৰ্চিত হবলৈ ধৰিছে।