নগাঁওঃ অসমীয়াৰ হিয়াৰ আমঠু, যাযাবৰী শিল্পী সুধাকণ্ঠ ড০ ভূপেন হাজৰিকা আজি আমাৰ মাজত নাই৷ মৰমৰ ভূপেন দা হেৰাই যোৱা সাত বছৰ হ’ল যদিও প্ৰতিজন অসমীয়াৰ বুকুত আজিৰ তাৰিখতো জীয়াই আছে ভূপেন দা৷ নিজৰ সৃষ্টিৰাজিৰে জগত জিনা ভূপেন দা যেন সদায় অমৰ৷ শিশুৰ পৰা বৃদ্ধলৈকে সকলোৰে অতি মৰমৰ-শ্ৰদ্ধাৰ আৰু চিনাকী নাম হৈছে ভূপেন দা৷
তেওঁৰ প্ৰতি থকা মৰম প্ৰতিজন অসমীয়াৰ বুকুত সেয়ে চিৰদিন ছাঁৰ দৰে থাকিব৷ ডাঙৰৰ কথা বাদেই কনমানি শিশুসকলো যে ভূপেন দাৰ একান্ত ভক্ত৷ কিয়নো নগাঁও জিলাৰ ৰাইদঙীয়াত অনুষ্ঠিত হোৱা এক অনুষ্ঠানত এটি কণমানিয়ে তাৰ প্ৰমাণ দিয়ে৷ ৰাইদঙীয়াৰ পাঁচআলিত থকা সৌৰভ ভৱন প্ৰাংগণত স্থানীয় সামাজিক-সাংস্কৃতিক অনুষ্ঠান 'আড্ডা আৰু সংগীত কাননে' সুধাকণ্ঠৰ এটি প্ৰতিমূৰ্তি নিৰ্মানৰ ব্যৱস্থা গ্ৰহন কৰে৷ স্থানীয় ৰাইজৰ পৰা প্ৰতিমূৰ্তি নিৰ্মাণৰ বাবে দান-বৰঙনি সংগ্ৰহ কৰে অনুষ্ঠান দুটাই৷
সকলো প্ৰস্তুতি সম্পন্ন কৰাৰ পিছত মহান শিল্পীগৰাকীৰ ষষ্ঠ মৃত্যুবাৰ্ষিকীৰ লগত সংগতি ৰাখি প্ৰতিমূৰ্তি নিৰ্মাণৰ শিলান্যাস স্থাপন কৰা হয়৷ আধাৰশিলা স্থাপন অনুষ্ঠানত উপস্থিত হৈ স্থানীয় এটি চাৰি বছৰীয়া শিশুয়ে সুধাকণ্ঠৰ প্ৰতি থকা মৰম আৰু শ্ৰদ্ধা যি দৰে প্ৰদৰ্শন কৰিলে তাক প্ৰত্যক্ষ কৰি সকলো স্তম্ভিত হৈ পৰে৷ কাৰণ, বৰ ৰাইদঙীয়াৰ টংকেশ্বৰ বৰা নামৰ সাংস্কৃতিবান লোকজনৰ চাৰি বছৰীয়া পুত্ৰ অম্লান বৰাই এটা খুচুৰা পইচাৰ ভৰ্তি টেমা সুধাকণ্ঠৰ প্ৰতিমূৰ্তি নিৰ্মাত খৰছ কৰিবৰ বাবে উদ্যোক্তাসকলক প্ৰদান কৰে৷
জানিব পৰা মতে, অনবৰতে সুধাকণ্ঠৰ গীত গুনগুণাই থকা এই শিশুটিয়ে বহুদিনৰে পৰা খুচুৰা পইচা সেই টেমাটোত জমা কৰি ৰাখিছিল একমাত্ৰ ভূপেন দাক ভালপোৱাৰ স্বীকৃতিস্বৰূপে৷ কাজেই ,কনমানি শিশুটিৰ এনে মহানুভৱতাক লৈ এতিয়া সৰ্বতে ব্যাপক চৰ্চা চলা দেখিবলৈ পোৱা গৈছে৷