ডিজিটেল ডেস্কঃ বিহাৰ তথা দেশৰ আটাইতকৈ চৰ্চিত বৰ্ষীয়ান ৰাজনৈতিক নেতা আৰ জে ডি দলৰ ৰাষ্ট্ৰীয় অধ্যক্ষ লালু প্ৰসাদ যাদৱে আৰম্ভ কৰিছে নতুন খেল৷ নীতিশ-মোডীৰ শাসনকাৰ্যত হোৱা অন্যায়ৰ প্ৰতিশোধ ল’বলৈ আৰম্ভ কৰিছে এই নতুন খেল৷
এই খেলৰ বাবে লালুৱে সহযোগী হিচাপে ল’ব বিচাৰিছে জনতা দল ইউনাইটেডৰ (JDU) জ্যেষ্ঠ নেতা শৰদ যাদৱক৷ এই সংক্ৰান্তত ইতিমধ্যে লালুৱে তিনিটা টুইটেৰে বিজেপিৰ বিৰুদ্ধে খেলিবলগীয়া খেলখনৰ বিষয়ে শৰদ যাদৱক অৱগত কৰিছে ৷
শৰদলৈ লালুৱে প্ৰেৰণ কৰা টুইতকেইটাত কৈছে, লাঞ্চিত-বঞ্চিত দুখীয়াৰ খেতি-পথাৰৰ পৰা আৰম্ভ কৰি সকলো ধৰণৰ সমস্যা দুৰ কৰাৰ বাবে আমি দলৰ সকলোকে লৈ ৰাজপথৰ পৰা আৰম্ভ কৰি সংসদলৈকে যুঁজ দি যাম৷ মই আৰু শৰদ যাদৱে সংগ্ৰাম কৰোঁতে লাঠিৰ কোবো খাইছিলো৷
দেশৰ বাবে তেনে এক সংগ্ৰামৰ পুনশ্চঃ প্ৰয়োজন আহি পৰিছে৷ শোষিত-নিষ্পেষিত শ্ৰেণীটোৰ বাবে যুঁজ দিবই লাগিব৷ অন্য এটা টুইট কৰি লালুৱে কয়, দেশৰ দুখীয়া বঞ্চিত কৃষকসকলৰ সংকটমোচনৰ বাবে আমি আৰু নতুন আন্দোলন হাতত ল’ম৷ শৰদ ভাই আঁহা, আমি সকলোৱে একেলগ হৈ দক্ষিণপন্থী শাসনকাৰীক নিঃশেষ কৰোঁ- এই আহ্বান অধ্যক্ষগৰাকীৰ।