newsnextone.comডিজিটেল ডেস্কঃ মঙলবাৰে কৰ্ণাটকৰ নিৰ্বাচনী প্ৰচাৰৰ মাজতে কংগ্ৰেছ অধ্যক্ষ ৰাহুল গান্ধীক সাংবাদিকে সোধা এটি প্ৰশ্নৰ উত্তৰত তেওঁ ২০১৯ চনত কংগ্ৰেছে সংখ্যা গৰিষ্ঠতা লাভ কৰিলে প্ৰধানমন্ত্ৰী হোৱাৰ কথা ঘোষণা কৰিছিল৷
তাৰ পিছতে বুধবাৰে কৰ্ণাটকৰ এখনি নিৰ্বাচনী জনসভাত উপস্থিত থাকি প্ৰধানমন্ত্ৰী নৰেন্দ্ৰ মোডীয়ে ৰাহুল গান্ধীক তেওঁৰ উচ্চাকাংক্ষাৰ বাবে ইতিকিং কৰে৷ প্ৰধানমন্ত্ৰীগৰাকীয়ে নিৰ্বাচনী জনসভাত কংগ্ৰেছ অধ্যক্ষগৰাকীৰ নাম উল্লেখ নকৰাকৈয়ে তেওঁক ‘অহংকাৰী’ আৰু ‘অপৰিপক্ক’ বুলি কৈ দেশৰ জনতাই তেনে এজন প্ৰধানমন্ত্ৰীক সমৰ্থন কৰিব নেকি বুলি প্ৰশ্ন কৰে৷
‘‘তেওঁ সেই কথাবোৰৰ দৰেই এই কথাষাৰো উল্লেখ কৰিছে যিবোৰ কথাই কেতিয়াও মূল্য নাপায়৷ কোনোবাই নিজকে প্ৰধানমন্ত্ৰী হিচাপে কেনেদৰে ঘোষণা কৰিব পাৰে? এয়া অহংকাৰৰ বাহিৰে আন একো নহয়৷ ভাৰতে এনে এজন অপৰিপক্ক প্ৰধানমন্ত্ৰী স্বীকাৰ কৰিবনে? মোডীক ক্ষমতাৰ পৰা পদচ্যুত কৰাৰ কাৰণে বৃহৎ বৈঠক আয়োজন কৰা হৈছে৷ কিন্তু এই বৈঠকৰ জৰিয়তে কেনেদৰে মোডীক পদচ্যুত কৰিব পৰা যাব?’’ কৰ্ণাটকৰ কোলাৰ জিলাত এখন নিৰ্বাচনী জনসভাত অংশ লৈ নৰেন্দ্ৰ মোডীয়ে কয়৷
ৰাহুল গান্ধীয়ে মঙলবাৰে নিজৰ প্ৰধানমন্ত্ৰী হোৱাৰ আকাংক্ষা প্ৰকাশ কৰি মোডীয়ে দ্বিতীয় চৰকাৰ গঠন কৰাটো অসম্ভৱ বুলি মন্তব্য কৰে৷ তেওঁ কয়, ‘‘এজন ৰাজনৈতিক বিশ্লেষক হিচাপে মই আপোনালোক কম - মই যি কম সেয়া শুনি আপোনালোকে হাঁহিবও পাৰে - বিজিপিয়ে দ্বিতীয় চৰকাৰ গঠন কৰাটো অসম্ভৱ কথা৷ আৰু এয়াও অসম্ভৱ যে নৰেন্দ্ৰ মোডীয়ে ২০১৯ চনৰ পিছত ভাৰতৰ প্ৰধানমন্ত্ৰী হ’ব পাৰিব৷’’
সকলো বিৰোধী দলে বিজেপি আৰু আৰএছএছক শাসনৰ পৰা পদচ্যুত কৰিবলৈ সংকল্প গ্ৰহণ কৰিছে বুলিও মঙলবাৰে কৰ্ণাটকৰ নিৰ্বাচনী প্ৰচাৰৰ মাজতে মন্তব্য কৰিছিল কংগ্ৰেছ অধ্যক্ষ ৰাহুল গান্ধীয়ে৷