ডিজিটেল ডেস্কঃ দিল্লীৰ ওচৰৰ গাজিয়াবাদৰ এখন মাদ্ৰাছাত এগৰাকী ১০ বছৰীয়া নাবালিকা ধৰ্ষণত হাত থকাৰ সন্দেহত এগৰাকী মৌলবীক শনিবাৰে দিল্লী আৰক্ষীয়ে আটক কৰবলৈ সক্ষম হয়৷ যোৱা এসপ্তাহ পূৰ্বে এজন নাবালক কিশোৰে দিল্লীৰ গাজিপুৰৰ এগৰাকী ১০ বছৰীয়া নাবালিকাক অপহৰণ কৰি মাদ্ৰাছাৰ ভিতৰত ধৰ্ষণ কৰা ঘটনাত মৌলবীজনো জড়িত থকাৰ সন্দেহ প্ৰকাশ কৰা হৈছে৷
শুকুৰবাৰে এই ঘটনাৰ তদন্ত অপৰাধ নিয়ন্ত্ৰন শাখাক প্ৰদান কৰা হৈছিল৷ তাৰ পিছতেই অপৰাধ নিয়ন্ত্ৰণ শাখাৰ সংযুক্ত আয়ুক্ত আলোক কুমাৰৰ তদন্তৰ পিছত মৌলবী গুলাম শাহিদক আটক কৰা হয়৷ আলোক কুমাৰে কোৱা অনুসৰি মৌলবী গুলাম শাহিদে ১০ বছৰীয়া নাবালিকাগৰাকীৰ ধৰ্ষণ সন্দৰ্ভত সকলো কথা জানিছিল৷ তেওঁক পস্কো আইনৰ অধীনত আটক কৰি সোধ পোছ কৰা হৈছে৷
‘মৌলবীজনে আভিযুক্ত কিশোৰজনক ফোন যোগে নিৰ্দেশ প্ৰদান কৰিছিল৷ কিশোৰজনে ধৰ্ষিতা নাবালিকাগৰাকীক ২৪ ঘন্টাৰো অধিক সময় মদ্ৰাছাৰ ভিতৰত লুকুৱাই ৰাখিছিল৷ এই সকলোবোৰ কথা মৌলবীজনে জনাৰ পিছতো নাবালিকাগৰাকীৰ পৰিয়াল অথৱা আৰক্ষীক খবৰ দিয়াৰ পৰা বিৰত আছিল৷’ সেই ভিত্তিত মৌলবীজনো অপৰাধৰ সমভাগী বুলি মন্তব্য কৰে অপৰাধ নিয়ন্ত্ৰণ শাখাৰ সংযুক্ত আয়ুক্ত আলোক কুমাৰে৷
ইফালে ঘটনাৰ তদন্তৰ বাবে বৃহস্পতিবাৰে অপৰাধ নিয়ন্ত্ৰণ শাখাৰ এটা দলে গাজিয়াবাদৰ হিডন বিহাৰস্থিত মাদ্ৰাছাখনত উপস্থিত হৈ মৌলবীজনৰ মোবাইলৰ লগতে আন কেতবোৰ গুৰুত্বপূৰ্ণ নথিপত্ৰ জব্দ কৰিছিল৷
উল্লেখ্য যে, ২০ এপ্ৰিলত নাবালিকাগৰাকী নিখোজ হোৱাৰ পিছত ২১ এপ্ৰিলত নাবালিকাগৰাকীৰ পিতৃয়ে আৰক্ষীৰ ওচৰত এজাহাৰ দাখিল কৰিছিল৷ তাৰ পিছতেই ২২ এপ্ৰিলত দিল্লী আৰক্ষীয়ে মাদ্ৰাছাৰ পৰা নাবালিকাগৰাকীক উদ্ধাৰ কৰিবলৈ সক্ষম হৈছিল৷
আনহাতে ঘটনাৰ অভিযুক্ত কিশোৰজনকো দিল্লী আৰক্ষীয়ে আটক কৰিবলৈ সক্ষম হোৱা বুলি জানিব পৰা গৈছে৷