জয়ন্ত মুদৈ, নগাঁওঃ কৰ্মসংস্থাপনৰ বাবে যোৱা নগাঁও জিলাৰ জাজৰি থানাৰ অন্তৰ্গত কাকমাৰীৰ এজন যুৱক বৰ্হিঃৰাজ্যত চলন্ত ৰে’লৰপৰা সন্ধানহীন হোৱা এক ঘটনাই ব্যাপক চাঞ্চল্যৰ সৃষ্টি কৰিছে৷
প্ৰাপ্ত তথ্য মতে, কাকমাৰী বৰবড়িৰ নিতুমনি ডেকা (২২) নামৰ নিবনুৱা যুৱকজন কৰ্মসংস্থাপনৰ বাবে একে অঞ্চলৰে আন তিনিজন যুৱকৰ সৈতে যোৱা দেওবাৰে পুৱা ৬ বজাত ৰে’লৰে গুৱাহাটীৰপৰা বেংগালুৰু অভিমুখে যাত্ৰা কৰে৷
এনেদৰে যাত্ৰা কালতেই সোমবাৰে নিশা প্ৰায় চাৰে দহ বজাত লগৰীয়া যুৱককেইজনৰ কাষৰপৰা প্ৰস্ৰাৱ কৰিবলৈ ট্ৰয়লেটলৈ যোৱাৰ পাছৰেপৰাই চলন্ত ৰে’লতেই সন্ধানহীন হৈ পৰে নিতুমনি৷ পাছত নিতুমনিক বহু বিচাৰ-খুচাৰ কৰিও কোনো সম্ভেদ নোলোৱাত নিশা প্ৰায় চাৰে এঘাৰ মান বজাত লগত যোৱা যুৱককেইজনে নিতুমনিৰ ঘৰলৈ ফোনৰ জৰিয়তে নিখুজ হোৱাৰ বিষয়ে অৱগত কৰাৰ লগতে চেন্নাই আৰক্ষীকো ঘটনাৰ সবিশেষ ব্যক্ত কৰে৷
উল্লেখ্য, উক্ত ৰে’লতে যাত্ৰা কৰা এজন লোকে নিতুমনি ৰে’লৰপৰা তললৈ পৰি যোৱা দেখা পোৱা বুলি লগৰীয়া যুৱককেইজনক জানিবলৈ দিয়ে যদিও কিদৰে পৰি গ’ল সেই সন্দৰ্ভত কিন্তু অজ্ঞাতাহে প্ৰকাশ কৰে৷ সেয়ে কোনো দুৰ্বৃত্তই নিতুমনিৰ পকেটত থকা ম’বাইল ফোন আৰু নগদ চাৰি হাজাৰ টকা লুট কৰি পাছত ৰে’লৰপৰা পেলাই দিয়া বুলি সন্দেহ ব্যক্ত কৰিছে পৰিয়ালৰ লোকে৷
ইফালে, নিতুমনিৰ দুৰ্ভগীয়া পৰিয়ালৰ লোকে আজি যুৱকজনৰ নিখুজ সন্দৰ্ভত স্থানীয় জাজৰি আৰক্ষীক এখন এজাহাৰ দাখিল কৰিছে বুলি জানিব পৰা গৈছে৷