নলবাৰীঃ এতিয়া প্ৰতিটো দিনেই হাহাকৰ কৰি পাৰ কৰিব লগা হৈছে নলবাৰী আখৰাস্থিত ASRF জোৱানৰ পৰিয়ালে৷ এসাজ ভাতৰ বাবে ককবকাব লগা হয় সন্তানৰ সন্মুখত৷ তেওলোকৰ সন্তানে দুখৰ দিন পাৰ কৰিব লগা হয়৷ কাৰণ তেওলোকে চৰকাৰৰ চাকৰি কৰে যদিও দৰমহা কেইটা সময় মতে নাপােৱাৰ ফলত দিন নোযোৱা হৈছে তেওলোকৰ৷ কিয়নো তেওলোকে মাহৰ পিছত মাহ ধৰি পোৱা নাই দৰমহা৷ ASRF জোৱানৰ কোলাই-পাচিয়ে নধৰা হৈছে দুখ৷
যাৰ ফলত নলবাৰী আখৰাস্থিত প্ৰথম অসম বিশেষ সংৰক্ষিত বাহিনীৰ অধিনায়কৰ কাৰ্যালয়ত মঙলবাৰে জোৱানসকলে প্ৰতিবাদ সাব্যস্ত কৰিব লগা হয়৷ উল্লেখ্য যে, বিগত ডিচেম্বৰ মাহৰ পৰা জোৱানসকলে দৰমহা লাভ কৰা নাই৷ জোৱানসকলৰ পৰিয়াললৈ অন্ধকাৰ নামি আহিছে৷ দৰমহা বিচাৰি জোৱানসকলে কাৰ্যালয় চৌহদত প্ৰতিবাদ সাব্যস্ত কৰে৷ অসম চৰকাৰ হায় হায়, আমাৰ দৰমহা মোকলাই দিয়ক, মন্ত্ৰী হিমন্ত বিশ্ব শৰ্মা মুৰ্দাবাদ আদি শ্ল’গানেৰে পৰিবেশ উত্তাল কৰে৷ আনহাতে, বিষয়া জোনালী পাটগিৰীয়ে কোনো সহাৰি নিদিয়াৰো অভিযোগ উত্থাপন কৰে৷
যিটো সময়ত চৰকাৰে স্মাৰ্ট আৰক্ষীৰ সপোন দেখিছে তেনে সময়তে প্ৰথম অসম বিশেষ সংৰক্ষিত বাহিনীৰ জোৱানসকলক চৰকাৰে কৰা বঞ্চনা কৰাৰ অভিযোগ উত্থাপন কৰে৷ বাজেট নথকাৰ অজুহাতত মাহৰ পিচত মাহ ধৰি চৰকাৰে প্ৰথম অসম বিশেষ সংৰক্ষিত বাহিনীৰ জোৱানক দৰমহা আদায় নিদিয়াকৈ পৰিয়াল চলােৱাত ব্যাপক সমস্যাত পৰে৷ আনকি জোৱানসকলৰ সন্তানৰ শিক্ষা-দিক্ষাৰ লগতে কেম্পত ৰেচন ১ মাৰ্চৰ পৰা বন্ধ হোৱাৰ আশংকাত পৰিছে এই জোৱানসকল৷ ৰাইজৰ জীৱন আৰু সম্পত্তিৰ নিৰাপত্তাত জড়িত জোৱানসকলৰ দৰমহা আদায় নিদিয়াত বিৰূপ প্ৰতিক্ৰিয়াৰ সৃষ্টি হৈছে৷ বিষয়া সহ ১১৩০গৰাকী জোৱানে তিনিমাহ ধৰি দৰমহা পোৱা নাই৷