নগাঁওঃ মানুহৰ জীৱন আৰু সম্পত্তিক লৈ সময়ে সময়ে নিৰাপত্তাৰ দোহাই দি মানুহে নিৰাপত্তাৰক্ষী নিয়োগ কৰাৰ দাবী উত্থাপন হৈ আহিছে যদিও এইবাৰ গৰুৰ নিৰাপত্তাক লৈ শংকিত হৈ পৰিছে নগাঁওবাসী৷ গৰুক নিৰপত্তা দিয়াৰ দাবী জনাবলৈ বাধ্য হৈছে নগাঁওবাসীয়ে৷ গৰুৰ সুৰক্ষাৰ দাবীত মুখ্যমন্ত্ৰীক আৰক্ষীৰ দল নিয়োগ কৰাৰ দাবী জনাইছে ৰাইজে৷
নগাঁও জিলাৰ বিভিন্ন প্ৰান্তৰ লগতে জাজৰি আৰক্ষী থানা এলেকাত আৰক্ষীৰ নিষ্ক্ৰিয় ভূমিকাৰ সুযোগ লৈ নিতৌ গৰু চুৰি কৰি নিয়ে চোৰৰ দলে৷ ক্ৰমাৎ চোৰৰ সন্ত্ৰাস বৃদ্ধি পাই অহাত গঞাৰাইজে উজাগৰি নিশা কটাবলৈ বাধ্য হৈছে৷ তৎস্বতেও জাজৰি আৰক্ষী কিম্বা গাঁওৰক্ষী বাহিনীয়ে এনে ক্ৰমবৰ্দ্ধমান গৰু চুৰিৰ ঘটনা ৰোধৰ বাবে কোনো ব্যৱস্থা গ্ৰহণ নকৰাত ৰাইজৰ মাজত ক্ষোভৰ সৃষ্টি হোৱাৰ বিপৰীতে একপ্ৰকাৰে শংকাৰ মাজেৰে সময় পাৰ কৰিবলগীয়াত হৈছে৷ যাৰ ফলত ৰাইজে উপায়বিহীন হৈ চোৰৰ পৰা গৰু ৰক্ষা কৰিবৰ বাবে আৰক্ষীৰ দল নিয়োগ কৰাৰ দাবী জনাইছে৷
নগাঁও জিলাৰ বিভিন্ন প্ৰান্তত এতিয়া গৰু চোৰৰ অতপালিত ৰাইজে আতংকিত হৈ পৰিছে৷ বিশেষকৈ জিলা খনৰ পশ্চিম প্ৰান্তৰ জাজৰি আৰক্ষী থানা এলেকাৰ গ্ৰাম্য অঞ্চলত বিগত কেইমাহমানৰ পৰা সঘনে সংঘটিত হৈ অহা গৰু চুৰিৰ ঘটনাই গঞাৰাইজৰ মাজৰ আতংকৰ সৃষ্টি কৰিছে৷ প্ৰতিদিনে গোহালিৰ পৰা গৰু চুৰি কিৰ নি সন্ত্ৰাসৰ সৃষ্টি কৰিছে৷ তাৰ মাজতে জিলাখনৰ ৰাইদঙীয়াৰ সমীপৰ মাহগুৰিৰ পৰা ৰাইজে গৰু চোৰক ধৰিবলৈ সক্ষম হয়৷
চাদিকুল ইছলাম আৰু ছাইদুল ইছলাম নামৰ দুজন যুৱকক গৰু চুৰি কৰাৰ অভিযোগ উত্থাপন কৰি ৰাইজে আৱদ্ধ কৰে৷ প্ৰাপ্ত খবৰ মতে, জাজৰি আৰক্ষী থানাৰ এলেকাৰ মাহগুৰিত দেওবাৰে নিশা প্ৰায় আঠ গাই গৰু এটা লৈ দুজন লোকে খোজকাঢ়ি গৈ থকা অৱস্থাত স্থানীয় ৰাইজৰ সন্দেহ ওপজাত দুয়োকে ধৰি সোধ-পোছ কৰে৷ প্ৰথমাৱস্থাত গৰুটো কিনি অনা বুলি আসৈ মাতিছিল যদিও ক্ৰয় কৰা ৰছিদ দেখুৱাব নোৱাৰাত দুয়োটাকে লপাথপা দিয়াত গৰু চুৰিৰ কথা স্বীকাৰ কৰে৷ লগে লগে ৰাইজে জাজৰি আৰক্ষীক খবৰ দিয়াত আৰক্ষী ঘটনাস্থলীত উপস্থিত হৈ চুৰি গৰুসহ চোৰদুটাক আটক কৰি থানালৈ লৈ যায়৷