ডিজিটেল ডেস্কঃ কংগ্ৰেছ অধ্যক্ষ হোৱাৰ পিছত এইবাৰ ৰাহুল গান্ধীয়ে কৰ্ণাটত নিৰ্বাচনী প্ৰচাৰৰ মাজতে প্ৰধানমন্ত্ৰী হোৱাৰ কথা প্ৰথমবাৰলৈ উল্লেখ কৰে৷ কৰ্ণাটকৰ এখন ৰেলীত অংশ লোৱাৰ সময়ত ৰাহুল গান্ধীক ২০১৯ চনত যদি কংগ্ৰছে সংখ্যা গৰিষ্ঠতা লাভ কৰে, তেন্তে ৰাহুল গান্ধী প্ৰধানমন্ত্ৰী হ’ব নে নাই বুলি প্ৰশ্ন কৰা হৈছিল৷ এই প্ৰশ্নৰ উত্তৰ দি কংগ্ৰেছ অধ্যক্ষগৰাকীয়ে কয় যে যদি ২০১৯ত কংগ্ৰেছ শাসনলৈ আহে, তেন্তে নিশ্চয় তেওঁ প্ৰধানমন্ত্ৰী পদত উপবিষ্ট হ’ব৷
আনফাল কৰ্ণাটকত নিৰ্বাচনী প্ৰচাৰৰ মাজতে প্ৰধানমন্ত্ৰী নৰেন্দ্ৰ মোডীক কটাক্ষ কৰিব নেৰিলে কংগ্ৰেছ অধ্যক্ষ ৰাহুল গন্ধীয়ে৷ সাবাংদিকৰ সতে হোৱা কথা বতৰাত ৰাহুল গান্ধীয়ে কয়, বিজেপিয়ে জনতাৰ প্ৰশ্নৰ উত্তৰ কিয় দিব নিবিচাৰে? মোডীয়ে জনতাৰ প্ৰশ্নৰ উত্তৰ দিয়া উচিত৷ ৰাহুল গান্ধীয়ে কয় যে মই এতিয়া ২০১৯ৰ নিৰ্বাচনৰ বিষয়ে একো নকও৷ মই কৰ্ণাটক নিৰ্বাচনৰ বিষয়েহে এতিয়া কম৷
আনহাতে ৰাহুল গান্ধীয়ে কৰ্ণাটকৰ বিজেপিৰ মুখ্যমন্ত্ৰী পদৰ প্ৰাৰ্থী য়েদেৰুপ্পাৰ বিষয়ে মন্তব্য কৰি কয়, আমি প্ৰধানমন্ত্ৰী মোডীয়ে ভ্ৰষ্ট প্ৰাৰ্থীক প্ৰাৰ্থীত্ব কিয় দিছে বুলি বাৰে বাৰে প্ৰশ্ন কৰিছো৷ তেওঁ প্ৰাৰ্থীত্ব প্ৰদান কৰা কৰ্ণাটকৰ মুখ্যমন্ত্ৰী পদৰ প্ৰাৰ্থী বি এছ য়েদেৰুপ্পাই নিজে জেল খাটি আহিছে৷
বিজেপিৰ ৰাষ্ট্ৰীয় অধ্যক্ষ অমিত শ্বাহৰ বিষয়ে মন্তব্য কৰি ৰাহুল গান্ধীয়ে কয় যে অমিত শ্বাহৰ বিৰুদ্ধে ৰুজু হৈ থকা গোচৰ সমূহৰ বিষয়ে সকলোৱে জানে৷ যিটো দলে নিৰ্বাচনৰ প্ৰাকমূহুৰ্তত নিকা আৰু স্বচ্ছতাৰ কথা কয়, তেওঁলোকেই দায়িত্বজ্ঞানহীন মন্তব্য কৰে বুলিও বিজেপিক কটাক্ষ কৰে কংগ্ৰেছ অধ্যক্ষ ৰাহুল গান্ধীয়ে৷