নগাঁওঃ নগাঁও জিলাৰ বৃহত্তৰ চকলাঘাট কেন্দ্ৰীয় ৰঙালী বিহু উৎসৱ অহা ১৬ মে’ত দিনজোৰা কাৰ্যসূচীৰে চকলাঘাট ৰাস মন্দিৰ প্ৰেক্ষাগৃহত উদযাপন কৰাৰ বাবে ব্যাপক প্ৰস্তুতি চলাই থকা পৰিলক্ষিত হৈছে৷ ইতিমধ্যে দেৱ কুমাৰ বৰাক সভাপতি, অতুল চন্দ্ৰ শইকীয়াক কাৰ্যকৰী সভাপতি, গিৰিকান্ত বৰাক সম্পাদক তথা বিকাশ বৰাক যুটীয়া সম্পাদক হিচাপে লৈ শক্তিশালী উদযাপন সমিতি গঠন কৰা হৈছে৷
কাৰ্যসূচী অনুসৰি পুৱা ৯ বজাত বিহুৰ পতাকা উত্তোলন, ৯.৩০ বজাত স্মৃতি তৰ্পণ আৰু ১০ বজাত পৰিবেশ সজাগতা-বৃক্ষৰোপন কাৰ্যসূচী ৰূপায়ণ কৰাৰ অন্তত দুপৰীয়া ১২ বজাৰ পৰা হুচৰি বিহু আৰু জেংবিহু প্ৰতিযোগিতা অনুষ্ঠিত হ’ব৷ চকলাঘাট উচ্চতৰ মাধ্যমিক বিদ্যালয়ৰ অধ্যক্ষ ক্ষীৰোদ কুমাৰ ৱৰুৱাই উদ্বোধন কৰিবলগীয়া প্ৰতিযোগিতাৰ উদ্বোধনী অনুষ্ঠানত আলফাৰ সাধাৰণ সম্পাদক অনুপ চেতিয়াই মুখ্য অতিথি হিচাপে অংশগ্ৰহন কৰিব৷
সন্ধ্যা ৬ বজাত বঁটা বিতৰণী আৰু সম্বৰ্ধনা অনুষ্ঠানৰ পিছতে নিশা ৮ বজাৰ পৰা বাৰেৰহনীয়া সাংস্কৃতিক অনুষ্ঠান অনুষ্ঠিত হ’ব৷ বটদ্ৰৱা সমষ্টিৰ বিধায়িকা আঙুৰলতা ডেকাই উদ্বোধন কৰিবলগীয়া অনুষ্ঠানত অসমীয়া কৃষ্টি-সংস্কৃতি প্ৰদৰ্শন কৰাৰ লগতে জনপ্ৰিয় কণ্ঠশিল্পী ৰূপাংকৃতা-অলংকৃতা আৰু অসীম দাসে সংগীতানুষ্ঠান পৰিবেশন কৰিব৷ জেংবিহু আৰু হুচৰী বিহু প্ৰতিযোগিতাত প্ৰথম, দ্বিতীয় আৰু তৃতীয় পুৰস্কাৰ হিচাপে নগদ ৩০০১ টকা, ২০০১ টকা আৰু ১০০১ টকাৰ লগতে একোখনকৈ মানপত্ৰ প্ৰদান কৰা হ’ব বুলি প্ৰচাৰ উপ-সমিতিৰ সভাপতি কল্যাণ কুমাৰ বৰা আৰু সম্পাদক জয়ন্ত মুদৈয়ে জানিবলৈ দিছে৷