
newsnextone.com| ওদালগুৰিঃ ২ অক্টোবৰ কাইলৈ দেশৰ জাতিৰ পিতা মহাত্মা গান্ধীৰ ১৪৯ সংখ্যক জন্মজয়ন্তী। সমগ্ৰ দেশজুৰি কাইলৈ জাতিৰ পিতা গান্ধীজীক স্মৰণ কৰিব। ৰাজ্যৰ বিভিন্ন প্ৰান্ততো গান্ধী জয়ন্তী উপলক্ষে বিভিন্ন কাৰ্যসূচী ৰূপায়ণ কৰা হৈছে। ব্যতিক্ৰম নহয় ওদালগুৰি চহৰ। ওদালগুৰি চহৰখনৰ মাজমজিয়াত অৱস্থিত ওদালগুৰি ৰে’ল ষ্টেচনত এটা সময়ত পদাৰ্পণ কৰিছিল স্বাধীনতা আন্দোলনৰ গুৰি ধৰোঁতা জাতিৰ পিতা মহাত্মা গান্ধীয়ে। তেখেতে জীৱিত কালত চাৰিবাৰকৈ অসম ভ্ৰমণ কৰিছিল। তেখেতে তৃতীয়বাৰ অসম ভ্ৰমণলৈ অহাৰ সময়ত হৰিজন সেৱক সংঘৰ এক কাৰ্যসূচীত অংশগ্ৰহণ কৰিবলৈ তেজপুৰলৈ ৰাওনা হৈছিল।
অনুষ্ঠানটোৰ পৰা ৰে’লেৰে ঘুৰি অহাৰ সময়ছোৱাত ১৯৩৪ চনৰ ১২ এপ্ৰিল তাৰিখে গান্ধীজীয়ে ওদালগুৰি ৰে’ল ষ্টেচনত উপস্থিত হৈ ৰে’লৰ পৰা নামি কিছুসময় ষ্টেচনটো পৰিদৰ্শন কৰাৰ কথা ইতিহাসত সন্নিৱিষ্ট আছে। সেয়েহে মহান লোকগৰাকীৰ ওদালগুৰি ৰে’ল ষ্টেচনৰ সৈতে থকা সম্পৰ্কৰ বাবে নিখিল বড়ো ছাত্ৰ সন্থা চমুকৈ এবছুৱে গান্ধী জয়ন্তী উপলক্ষে কালি ওদালগুৰি ৰে’ল ষ্টেচন চৌহদত এক শ্ৰদ্ধাঞ্জলি কাৰ্যসূচী ৰূপায়ণ কৰিছে।
কাৰ্যসূচী অনুসৰি পুৱা ৮:৩০ বজাত শিক্ষাৰ্থী, ৰাইজ আৰু অতিথিৰ আগমণ, পুৱা ৮:৪৫ বজাত পতাকা উত্তোলন কৰিব এবছুৰ কেন্দ্ৰীয় সভাপতি প্ৰমোদ বড়োই, ৯ বজাত গান্ধীজীৰ প্ৰতিচ্ছবিত মাল্যাৰ্পন কাৰ্যসূচী মুকলি কৰিব সমাজকৰ্মী তথা জেষ্ঠ্য নাগৰিক ৰামেশ্বৰ বড়োৱে, ৯:৩০ বজাত শান্তিৰ প্ৰতীক পাৰ চৰাই উৰুৱাব জিলা আৰক্ষী অধীক্ষক ৰাজবীৰ সিঙে, ৯:৪৫ বজাত শান্তি সমদল কাৰ্যসূচী মুকলি কৰিব বন বিষয়া মাধুৰ্য্য শৰ্মাই। ১০ বজাত মুকলি আলোচনাৰ বিষয়বস্তু হৈছে ভাৰতবৰ্ষ স্বাধীনতাৰ বাবে গান্ধীজীৰ যুঁজ, আন্তৰাষ্ট্ৰীয় অহিংসা দিৱস আৰু বন্যপ্ৰাণী সপ্তাহ-২০১৮।
জিলা উপায়ুক্ত দিলীপ কুমাৰ দাসে মুকলি কৰিবলগীয়া উক্ত আলোচনাত সভাপতিত্ব কৰিব এবছুৰ উপ-সভাপতি দ্বিপেন বড়োই। আদৰণি ভাষণ প্ৰদান কৰিব এবছু সভাপতি প্ৰমোদ বড়োই, মুখ্য অতিথিৰূপে উপস্থিত থাকিব সৌম্যদীপ দত্ত, নিৰ্দিষ্ট বক্তা হিচাপে উপস্থিত থাকিব নবীন মল্ল বড়ো, নৰেশ্বৰ ডেকা, জয়ন্ত কুমাৰ দাস, পুষ্পধৰ বাছটোলা আৰু গোবিন্দ চন্দ্ৰ বসুমতাৰী। কাৰ্যসূচীটোত বহু বিশিষ্ট অতিথিৰ লগতে বিভিন্ন দল-সংগঠনৰ প্ৰতিনিধি উপস্থিত থাকিব। কাৰ্যসূচীটোত ৰাইজৰ উপস্থিতি কামনা কৰিছে এবছু নেতৃত্বই।