ইম্ফলঃ ৰাষ্ট্ৰীয় নিৰাপত্তা আইনৰ অধীনত কাৰাগাৰলৈ নিক্ষেপ কৰা মণিপুৰৰ সাংবাদিক কিশোৰচন্দ্ৰ ৱাংখেমৰ গোচৰ সন্দৰ্ভত মণিপুৰ উচ্চ ন্যায়ালয়ত কেন্দ্ৰ আৰু ৰাজ্য চৰকাৰলৈ জাননী জাৰি কৰিছে৷
মণিপুৰৰ মুখ্যমন্ত্ৰী বীৰেন সিঙক প্ৰধানমন্ত্ৰী নৰেন্দ্ৰ মোদীৰ ‘কাঠপুতলা’ বুলি সাংবাদিকজনে ফেচবুকত এটা প'ষ্ট দিছিল৷ ইয়াৰ পাছতে তেওঁ চৰকাৰে আটক কৰি অৱশেষত ৰাষ্ট্ৰীয় নিৰাপত্তা আইনৰ অধীনত গ্ৰেপ্তাৰ কৰে৷
এই গ্ৰেপ্তাৰৰ বিৰুদ্ধে কিশোৰচন্দ্ৰই উচ্চ ন্যায়ালয়ত আবেদন জনোৱাত ন্যায়ালয়ে কেন্দ্ৰ আৰু ৰাজ্য চৰকাৰলৈ জাননী জাৰি কৰি ১ ফেব্ৰুৱাৰীৰ ভিতৰত ইয়াৰ উত্তৰ দিবলৈ নিৰ্দেশ দিয়ে৷
কিশোৰচন্দ্ৰৰ অধিবক্তা শ্ৰীজি ভাৱছাৰে এই সন্দৰ্ভত উচ্চতম ন্যায়ালয়ত জ্যেষ্ঠ অধিবক্তা মাৰ্কাণ্ডে কাটজুৰ পৰামৰ্শ গ্ৰহণ কৰে৷ কাটজুই কয় যে কিশোৰচন্দ্ৰ ওৱাং খেমৰ অধিবক্তা শ্ৰীজি ভাৱছাৰৰপৰা মই এখন ই-মেইল পাইছোঁ৷ সাংবাদিকজনে মণিপুৰ চৰকাৰ আৰু মুখমন্ত্ৰীজনক সমালোচনা কৰাৰ বাবেই স্বৈৰাছাৰী শাসকৰ দৰে তেওঁক কাৰাগাৰলৈ নিক্ষেপ কৰা হ'ল৷ এইয়া ৰাজ্য চৰকাৰৰ ক্ষমতা আৰু আইনৰ অপ-প্ৰয়োগৰ বাদে আন একো নহয়৷
উল্লেখ্য যে মণিপুৰত আৰ এছ এছে ঝান্সীৰ ৰাণী লক্ষ্মীবাইৰ জন্ম-জয়ন্তী উদযাপন কৰিবলৈ লোৱাত সাংবাদিকজনে ৰাজ্যখনত স্বাধীনতা যুঁজাৰুসকলক পাহৰি নাযাবলৈ সকীয়াই দিছিল৷