গুৱাহাটীঃ মহানগৰীত গাড়ী চোৰৰ নতুন কৌশল৷ এইবাৰ শিশুৰ দ্বাৰা গাড়ী চুৰি কাণ্ডত নামি পৰিছে মহানগৰীৰ গাড়ী চোৰ৷ দেওবাৰে সংঘটিত হ’ল তেনে এক চুৰি কাণ্ড৷ ঘটনা অনুসৰি, দেওবাৰে ৰিজু মালাকৰ নামৰ উবেৰ চালকজনে মহানগৰীৰ ছয়মাইলস্থিত হোটেল লিলিৰ সন্মুখত নিজৰ উবেৰ বাহনখন ৰখাই চাফা কৰে৷
কিন্তু ভুলবশতঃ তেওঁ গাড়ীৰ চাবিপাত গাড়ীৰ ভিতৰতে থৈ বাহিৰৰ পৰা গাড়ীখন লক কৰাত বিমোৰত পৰে৷ পাছত ৰিজু মালাকৰে ঘৰৰ পৰা গাড়ীৰ আনপাত চাবি আনিবলৈ যায়৷ সেই সময়তেই লিখন চন্দ্ৰ ডেকা নামৰ এজন ১৫ বছৰীয়া কিশোৰে গাড়ীখনৰ এখন গ্লাছ ভাঙি গাড়ীখন লৈ যোৰাবাটৰ ফালে উধাও হয়৷
কিন্তু খানাপাৰাৰ গনেশ মন্দিৰৰ সমীপত দূৰ্ঘটনা সংঘটিত কৰে চালক ৰূপী চোৰ লিখনে৷ দুৰ্ঘটনাত পতিত হোৱা ব্যক্তিগত বাহনখনৰ গৰাকীৰ কিশোৰ চালকজনৰ প্ৰতি সন্দেহ উপজাত সোধ পোচ কৰাত উৰহি গছৰ ওৰ ওলায়৷
পাছত ঘটনাস্থলীত পুলিচ উপস্থিত হৈ চুৰি উবেৰ সহ ১৫ বছৰীয়া গাড়ী চোৰ লিখন চন্দ্ৰ ডেকাক আটক কৰিবলৈ সক্ষম হয়৷