ডিজিটেল ডেস্কঃ যিটো সময়ত কেন্দ্ৰীয় চৰকাৰে GSTৰ কৰ হ্ৰাস কৰিবলৈ বাধ্য হৈছে সেই সময়তে আহিছে এক আমোদজনক খবৰ৷ সমগ্ৰ দেশতে এতিয়া কেৱল GSTৰ চৰ্চা৷ বেপাৰী সকলৰ প্ৰতিবাদৰ বাবে চিন্তিত কেন্দ্ৰ চৰকাৰৰ লগতে ভাৰতীয় জনতা পাৰ্টী।তাতে আকৌ সন্মুখত গুজৰাটৰ নিৰ্বাচন৷ কিন্তু সাধাৰণ ৰাইজ বাদেই মন্ত্ৰীয়েও হেনো বুজি নাপাই GSTৰ অৰ্থ৷ এই কথা নিজেই প্ৰকাশ কৰিছে মধ্য প্ৰদেশ চৰকাৰৰ এজন মন্ত্ৰীয়ে৷
মধ্যপ্ৰদেশ চৰকাৰৰ মন্ত্ৰী ওম প্ৰকাশে এখন বৈঠকত কয় ‘GST কি মই নিজেই ভালদৰে বুজি পোৱা নাই, গতিকে এই সম্পৰ্কত মই একো নকওঁ৷ ডাঙৰ ডাঙৰ বিষয়া সকলেই বুজি পোৱা নাই, সাধাৰণ বেপাৰী সকলে ক’ত বুজি পাব৷ GST এক সাঁথৰৰ খেল হৈ পৰিছে, লাহে লাহে সকলো বুজি পাব আৰু তেতিয়াহে সকলোৱে শান্তি পাব’৷
সকলোৱে জ্ঞাত যে GSTৰ কাৰণে কংগ্ৰেছ চৰকাৰে সদায় কেন্দ্ৰ চৰকাৰ খনক আক্ৰমণ কৰি আহিছে৷ কিন্তু এতিয়া বিজেপিৰ নিজ ঘৰৰ পৰাই যদি এনেধৰণৰ মন্তব্য আহে তেনেহলে দলটোৰ বাবে উত্তৰ দিয়াটো কঠিন হৈ পৰিব৷ গুজৰাটৰ নিৰ্বাচনত GST যেন এটা ডাঙৰ বিষয় হৈ পৰিছে৷ দেশত GST ক যিদৰে প্ৰয়োগ কৰিলে তাৰ বাবে গুজৰাটৰ বেপাৰীসকলৰ চৰকাৰখনৰ ওপৰত যঠেষ্ট ক্ষোভ আছে৷
আগন্তুক বিধানসভা নিৰ্বাচনত গুজৰাটৰ বেপাৰীসকলৰ ভোট বিজেপিৰ বিপক্ষে যাব বুলি দলটো আতংকিত হৈ পৰিছে৷ কংগ্ৰেছৰ উপ-সভাপতি ৰাহুল গান্ধীয়েও GSTৰ বিৰুদ্ধে মোডী চৰকাৰখনক আৰম্ভণিৰে পৰা সমালোচনা কৰি আহিছে৷ ৰাহুলে GSTক নতুন নামেৰে নামাকৰণো কৰিছে ‘গব্বৰ সিঙ টেস্ক’ বুলি৷