newsnextone.com| শিৱসাগৰঃ শিৱসাগৰত পতঞ্জলী বন্ধ কৰিলে সংগ্রামী যুৱ ছাত্র পৰিষদে৷ বাবা ৰামদেৱে অসমলৈ আহি অসমবাসীৰ আগত আঠুকাঢ়ি ক্ষমা খোজক, বৰালক জেললৈ প্রেৰণ কৰক নহ’লে অনাগত দিনত অসমত পতঞ্জলিৰ ব্যৱসায় চলিবলৈ দিয়া নহ’ব, এয়া সংগ্রামী যুৱ ছাত্র পৰিষদৰ স্পষ্ট মত৷
সমগ্র অসমীয়া জাতিক একতাৰ ডোলেৰে বান্ধি অসমীয়া সাহিত্য সংস্কৃতিৰ ভঁৰাল চহকী কৰি থৈ যোৱা মহাপুৰুষ শংকৰদেৱক লৈ ৰামদেৱৰ উত্তৰ-পূৱৰ যোগ নিৰীক্ষক বাৰালে যি মন্তব্য কৰিলে তাকে লৈ আজি ৰাজ্য জ্বলিছে৷ বহুতৰ মতে বাৰালে কিমান জানে মহাপুৰুষ শংকৰদেৱৰ বিষয়ে? অসমীয়া সাহিত্য সংস্কৃতিলৈ ৰামদেৱ আৰু বাৰালৰ অৰিহণা কি?
অসমলৈ আহি অসমৰ চিপাঝাৰৰ যোগ শিবিৰত কি কৈছিল বাৰালে?
শংকৰদেৱ কোনো পণ্ডিত নাছিল, নামঘোষাত কোনো ভাল কথা লিখি থৈ যোৱা নাই শংকৰদেৱে, নামঘৰত মূৰ্খইহে মিঠাতেলৰ চাকি জ্বলায়৷
এনে অপমানজনক মন্তব্যৰে অসম জ্বলাইছে ৰামদেৱৰ শিষ্যই ,বহুতৰ মতে অসমত অসমীয়াৰ স্বাভীমানত আঘাত হানিবলৈ বাৰাল কোন? বহুতৰ মতে বাৰালে যদি অসমৰ বিষয়ে আৰু অসমৰ গুৰুজনা কোন নাজানে অসমৰ ভাষা আৰু সংস্কৃতিত কাৰ অৰিহণা বেছি সেই কথা নাজানে তেনেহলে কিয় এনে মন্তব্য প্রকাশ কৰিলে?
ৰামদেৱৰ শিষ্যৰ এনে বিৰুপ মন্তব্যৰ প্রতিবাদত আজি শিৱসাগৰ নগৰত অৱস্হিত পতঞ্জলিৰ বেনাৰত ক'লা ৰং সানি বিপনী আৰু পতঞ্জলি চিকিৎসালয় বন্ধ কৰাৰ লগতে ৰামদেৱ আৰু বাৰালৰ প্রতিমূৰ্তি দাহ কৰি প্রতিবাদ সাব্যস্ত কৰে ছাত্র সংগঠনটোৱে আৰু লগতে এই বিষয়ৰ ওপৰত অতি সোনকালে বিহিত ব্যৱস্থা গ্রহণ নকৰিলে কঠোৰ ব্যৱস্থা গ্রহণ কৰিবলৈ বাধ্য হব বুলি জানিবলৈ দিছে জাতীয় সংগঠনটোৱে৷