নতুন দিল্লীঃ যোৱা ১৪ ফেব্ৰুৱাৰীত জম্মু আৰু কাশ্মীৰৰ পুলৱামাত চিআৰপিএফৰ কনভয়ত হোৱা সন্ত্ৰাসবাদী ভয়ংকৰ আক্ৰমণ চোৰাংচোৱা সংস্থাসমূহৰ বিফলতাৰ বাবে হোৱা নাছিল৷ এই কথা আজি স্পষ্ট কৰে কেন্দ্ৰীয় চৰকাৰে৷
গৃহ বিভাগৰ ৰাজ্যমন্ত্ৰী জি কিষাণ ৰেড্ডীয়ে আজি সংসদক এই কথা কয়৷
তেওঁ লগতে কয়, জম্মু আৰু কাশ্মীৰত যোৱা তিনি দশকৰপৰা সন্ত্ৰাসবাদী কাৰ্যকলাপ চলি আছে আৰু নিৰাপত্তা বাহিনীসমূহে দীৰ্ঘম্যাদী পৰিকল্পনাৰে বহু সন্ত্ৰাসবাদীক নিধন কৰিবলৈ সক্ষম হৈছে৷
পুলৱামাৰ সন্দৰ্ভত তেওঁ লগতে কয়, নিৰাপত্তা বাহিনী আৰু চোৰাংচোৱা সংস্থাসমূহে সহযোগিতাৰে কাম কৰি আহিছে আৰু সঠিক সময়ত চোৰাংচোৱা সংস্থাসমূহে সঠিত তথ্য প্ৰদান কৰি আহিছে৷ ‘নিয়া’ই পুলৱামা বিস্ফোৰণৰ তদন্ত চলাই আছে আৰু ইতিমধ্যে ষড়যন্ত্ৰকাৰী, আত্মঘাতী আক্ৰমণকাৰী আৰু বাহন প্ৰদান কৰা লোকজনক চিনাক্ত কৰা হৈছে৷