ধুবুৰীঃ লোকগীতৰ সম্ৰাজ্ঞী প্ৰতিমা বৰুৱা পাণ্ডেৰ জীৱনৰ আধাৰত নিৰ্মিত তথা গোৱালপৰীয়া ভাষাৰ আত্মজীৱনী মূলক "সোণাৰ বৰণ পাখি" নামৰ বোলছবি খন ২৪ নৱেম্বৰত মুক্তি লাভ কৰিব৷ "সোণাৰ বৰণ পাখি" নামৰ ৰাজবংশী ভাষাৰ কথাছবি খনৰ পৰিচালক ববী শৰ্মাই এই কথা জানিবলৈ দিয়ে৷
ইতিমধ্যে বাংলাদেশৰ ঢাকাত অনুষ্ঠিত হোৱা আন্তৰ্জাতিক চলচিত্ৰ মহোৎসৱত "সোণাৰ বৰণ পাখি" নামৰ ছবিখনে বঁটা লাভ কৰিবলৈ সক্ষম হৈছে৷ সোমবাৰে ছবি খনৰ নিৰ্মাতা, নিৰ্দেশক তথা-কলা-কুশলী ধুবুৰীৰ ঐতিহ্যপূৰ্ণ গৌৰীপুৰত উপস্থিত হয়৷ গৌৰিপুৰত উপস্থিত হৈ প্ৰতিমা বৰুৱা পাণ্ডেৰ জন্মস্থান পৰিদৰ্শন কৰি "সোণাৰ বৰণ পাখি" নামৰ চিনেমাখন অসমৰ ৰাইজক চাবলৈ আহ্বান জনাই পৰিচালক ববী শৰ্মাই৷
সোণাৰ বৰণ পাখী নামৰ ছবিখনত ৰাজবংশী ভাষা তথা গোৱালপৰীয়া ভাষাৰ ছবি বুলি কয় ববী শৰ্মাই৷ কালজয়ী গোৱালপৰীয়া লোকগীতক বিশ্বত জনপ্ৰিয় কৰা প্ৰতিমা বৰুৱা পাণ্ডেই ১৯৯১ চনত 'পদ্মশ্ৰী', ১৯৮৮ চনত 'সংগীত নাটক একাডেমী' পুৰস্কাৰ লাভ কৰিছিল৷ ধুবুৰী জিলাৰ ঐতিহ্যপূৰ্ণ গৌৰীপুৰৰ ৰাজ কন্যা প্ৰয়াত প্ৰতিমা বৰুৱা পাণ্ডেৰ জীৱন, যৌৱন কাল তথা সংগীতৰ যাত্ৰা সুন্দৰ ভাবে দাঙি কৰা বুলি কয় শৰ্মাই৷