আগৰতলাঃ চুবুৰীয়া ৰাজ্য ত্ৰিপুৰাত বিধানসভা নিৰ্বাচনৰ প্ৰচাৰ এতিয়া তুংগত। যিমানেই নিৰ্বাচনৰ দিন চমু চাপি আহিছে সিমানেই নিৰ্বাচনৰ গৰম বতাহ বলিছে ত্ৰিপুৰাৰ আকাশত৷ ৰাজ্যখনৰ প্ৰতিটো প্ৰান্তৰ লোকেই এতিয়া নিৰ্বাচনক লৈ ব্যস্ত৷ পছন্দৰ পাৰ্টি আৰু প্ৰাৰ্থীৰ বিষয়ে চৰ্চা কৰাৰ লগতে ৰাজনৈতিক দল সমূহৰ মাজতো চলি আছে তৰ্ক যুদ্ধ৷
ৰাজ্যখনত নিৰ্বাচনী বতাহ প্ৰৱল হ’ব ধৰাৰ সময়তে চৰ্চালৈ আহিছে বিজেপি নেতৃত্বাধীন নৰ্থ-ইষ্ট ডেমক্ৰেটিক এলায়েন্স চমুকৈ নেডাৰ প্ৰসংগ৷ ত্ৰিপুৰাৰ নিৰ্বাচনত নৰ্থ-ইষ্ট ডেমক্ৰেটিক এলায়েন্সে বিশেষ ভূমিকা পালন কৰিব বুলি ভবা হৈছিল যদিও অৱশেষত বিজেপিয়ে অকলে নিৰ্বাচনত আগবঢ়া পৰিলক্ষিত হৈছে৷ অহা ১৮ ফেব্ৰুৱাৰীত ত্ৰিপুৰা বিধান সভা নিৰ্বাচনৰ ভোট দান অনুষ্ঠিত হ’ব আৰু ফলাফল ৩ মাৰ্চত ঘোষণা কৰা হ’ব৷
উল্লেখ্য যে, উত্তৰ-পূৱৰ ৫ ৰাজ্য কেইবাটাও আঞ্চলিক দলক লৈ বিজেপিৰ নেতৃত্বত নৰ্থ-ইষ্ট ডেমক্ৰেটিক এলায়েন্স চমুকৈ নেডাৰ গঠন কৰা হৈছিল৷ এই পাঁচখন ৰাজ্যৰ ভিতৰত তিনিখন ৰাজ্যত বিজেপিৰ চৰকাৰে আছে৷ জানিব পৰা মতে, ত্ৰিপুৰাই বিধান সভা নিৰ্বাচনত বিজেপি দলে ফলাফল ভাল কৰাৰ লক্ষ্যৰে ৰাজ্যখনৰ জনগোষ্ঠীয় দল ইণ্ডিজিনিয়াচ পিপুলচ ফ্ৰণ্ট অফ ত্ৰিপুৰা চমুকৈ আইপিএফটিৰ সৈতে মিত্ৰতা কৰিছে৷
ইণ্ডিজিনিয়াচ পিপুলচ ফ্ৰণ্ট অফ ত্ৰিপুৰাৰ পৰা বিভাজন হৈ গঠন কৰা আইপিএফটি-তিপহাৰা দলৰ মুখ্য নেতাসকলে ১ ফেব্ৰুৱাৰীত বিজেপি দলত চামিল হয়৷ সদস্যসকলৰ কোনোৱেই নিৰ্বাচনত প্ৰতিদ্বন্দ্বিতা আগবঢ়োৱা নাই যদিও কেৱল নিৰ্বাচনৰ সময় পাৰ কৰিবল বাবেহে তেওঁলোকক বিজেপিয়ে দললৈ অনা বুলি চৰ্চা হৈছে৷ উল্লেখ্য যে, ত্ৰিপুৰাৰ চিপিআইএম বিৰোধী দলসমূহক একত্ৰিত কৰিবলৈ নেডাই কোনো পদক্ষেপ লোৱা নাই৷
বিজেপি দলেহে নেতৃত্ব লোৱা দেখা গৈছে৷ বিজেপি দলে সকলো পদক্ষেপ লোৱাৰ লগতে নেডাৰ সৈতে সংযুক্ত হৈ থকা আন আন দলক এই ক্ষেত্ৰত জৰিত কৰা নাই৷ বিজেপিয়ে তেওঁলোকৰ দললৈ আন আন দলৰ নেতাক আনি যোগদান কৰিছে যদিও নেডাৰ নেতৃত্বত মিত্ৰজোঁট গঢ় দিয়াৰ বাবে কোনো পদক্ষেপ লোৱা দেখা নাযায়৷ কোনো এটা জনজাতীয় দলৰে মিত্ৰতা তথা নেডাৰ সন্দৰ্ভত সৈতে স্থিতি স্পষ্ট কৰা নাই বিজেপিয়ে৷