newsnextone.com | বোকাজানঃ নুমলীগড়-ৰঙাজান হৈ ৩৯নং ৰাষ্ট্ৰীয় ঘাইপথেৰে অৰুণাচল-ডিমাপুৰলৈ চোৰাং বিলাতী সুৰা সৰবৰাহ কৰি অহাটো নতুন কথা নহয়। পাহাৰীয়া জিলা কাৰ্বি আংলংৰ খটখটি অঞ্চলত ইতিমধ্যে বিগত সময়ত আৰক্ষী, আবকাৰী তথা বিআইইঅৰ অভিযানত বৃহৎ পৰিমাণৰ বিলাতী সুৰা জব্দ কৰিবলৈ সক্ষম হৈছে।
আনহাতে, কেইদিনমান পূৰ্বেও গুৱাহাটীৰ পৰা অহা আবকাৰী বিভাগৰ এটা দলে খটখটিত বাহৰ পাতি অবৈধ সুৰাৰ বিৰুদ্ধে অভিযান চলাইছিল যদিও অবৈধ সুৰা অথবা সুৰাৰ চোৰাং ব্যৱসায়িক আটক কৰিবলৈ সক্ষম নহল যদিও মঙলবাৰে বোকাজানৰ মহকুমাৰ খটখটিত আৰক্ষীয়ে গোপন তথ্যৰ ভিত্তিত অভিযান চলাই এক ট্ৰাক অবৈধ অৰুণাচলী সুৰা জব্দ কৰে।
অৰুণাচলৰ পৰা ডিমাপুৰলৈ নি থকা অৱস্থাত খটখটিৰ এটা পাৰ্কিংত ৰৈ থকা ট্ৰাক খন খটখটি আৰক্ষীয়ে জব্দ কৰে৷ আৰজে ০৭-জিডি-০০৬৭ নম্বৰৰ ট্ৰাকখনত ৫৬০ কাৰ্টুন মেকডুৱেল ৰাম থকাৰ লগতে জব্দ কৰা অবৈধ সুৰাখিনিৰ বজাৰ মূল্য প্ৰায় ৯ লাখ টকা বুলি জানিব পৰা গৈছে। উল্লেখ্য যে, খটখটিৰ এটা পাৰ্কিংত ৰখাই থোৱা অৱস্থাত আৰক্ষীয়ে জব্দ কৰা ট্ৰাকখনৰ চালক তথা হেণ্ডিমেন পলাতক বুলি আৰক্ষীৰ সূত্ৰত প্ৰকাশ।