হোজাইঃ ৰাজ্যত ক্ৰমাৎ বৃদ্ধি পাইছে ধৰ্ষণৰ ঘটনা। সৌ সিদিনা হোজাই জিলাৰ যমুনামুখত এগৰাকী শিক্ষয়িত্ৰীক ধৰ্ষণ কৰি হত্যা কৰা ঘটনাৰ প্ৰতিক্ৰিয়া মাৰ নৌযাওঁতেই পুনৰ সংঘটিত হৈছে আন এক চাঞ্চল্যকৰ ধৰ্ষণৰ ঘটনা৷
এইবাৰ নিজৰ বিয়ৈকেৰ হাতত ধৰ্ষিতা হ'ল তিনি সন্তানৰ এগৰাকী মাতৃ৷ প্ৰাপ্ত বাতৰি মতে, হোজাই থানাৰ অন্তৰ্গত দক্ষিণ গোলাঘটীয়া বস্তিৰ এই মহিলাগৰাকীক তেওঁৰ বিয়ৈ স্বপন দাসে দাবী ধমকি প্ৰদান কৰি বলপূৰ্বক ধৰ্ষণ কৰি আহিছিল৷
ঘটনাটো ৰাজহুৱা কৰিলে মহিলাগৰাকীক হত্যাৰো ভাবুকি প্ৰদান কৰিছিল স্বপনে। এনেদৰে ভয়-ভাবুকিৰে ঘৰত কোনো নথকাৰ সুযোগত দিন দুপৰতো লম্পট লোকজনে মহিলাগৰাকীক ধৰ্ষণ কৰি আহিছিল৷
শুকুৰবাৰেও অনুৰূপ ঘটনা সংঘটিত হোৱাত মহিলাগৰাকীয়ে সাহস গোটাই হোজাই আৰক্ষীৰ দ্বাৰস্থ হৈ ধৰ্ষণকাৰীজনৰ বিৰুদ্ধে এজাহাৰ দাখিল কৰে৷ উক্ত এজাহাৰৰ ভিত্তিত আৰক্ষীয়ে তদন্ত চলাই যোৱা নিশা ধৰ্ষণকাৰীজনক মইনাপুৰৰ পৰা কৰায়ত্ত কৰে৷
আৰক্ষীৰ জেৰাত ধৰ্ষণকাৰীজনে সমস্ত ঘটনা স্বীকাৰ কৰিছে বুলি জানিব পৰা গৈছে৷ শনিবাৰে ধৃত ধৰ্ষণকাৰী স্বপনক আদালতত হাজিৰ কৰোৱাৰ অন্তত আৰক্ষীয়ে জেললৈ প্ৰেৰণ কৰে৷