লাহোৱালঃ জ্বৰত আক্ৰান্ত ৰোগীক খৰৰ ঔষধ দিয়াত তীব্ৰ প্ৰতিক্ৰিয়াৰ সৃষ্টি হৈছে ডিব্ৰুগড় জিলাৰ লাহোৱালত৷ অঞ্চলটোৰ ৫ বছৰীয়া এটি শিশুক এগৰাকী ফাৰ্মাচিষ্টে খৰ-খজুৱতিৰ ঔষধ খাবলৈ দিয়াত শিশুটো গুৰুতৰভাৱে অসুস্থ হৈ চিকিৎসাধীন হ’বলগীয়া হয়৷
ডিব্ৰুগড় জিলাৰ লাহোৱালৰ ৰহমৰীয়া ক্ষুদ্ৰ প্ৰাথমিক স্বাস্থ্য কেন্দ্ৰত সংঘটিত হৈছে এই কাণ্ড। জানিব পৰা মতে, লাহোৱালৰ চামনি গাঁৱৰ টিৰুজ গোহাঁইৰ ৫ বছৰীয়া পুত্ৰ অবিনাশ গোহাঁইৰ জ্বৰ হোৱাত যোৱা ১১ জুলাইত স্থানীয় ৰহমৰীয়া ক্ষুদ্ৰ প্ৰাথমিক স্বাস্থ্য কেন্দ্ৰত চিকিৎসাৰ বাবে লৈ যায়৷
ক্ষুদ্ৰ প্ৰাথমিক স্বাস্থ্য কেন্দ্ৰৰ ফাৰ্মাচিষ্ট সুশীল শৰ্মাই শিশুটোক কাহৰ ঔষধৰ সলনি খৰ-খজুৱতিৰ ঔষধ দিয়ে। চিকিৎসালয়খনৰ পৰা দিয়া ঔষধ শিশুটোক খুৱাই দিয়াৰ পাছতে অসুস্থ পৰে শিশুটো।
এগৰাকী চাহ-বাগিছাৰ ফাৰ্মাচিষ্টে শিশুটোক দিয়া ঔষধখিনি খৰ-খজুৱতিৰ ঔষধ বুলি চিনাক্ত কৰে৷ বৰ্তমান শিশুটি ডিব্ৰুগড়ৰ অসম মেডিকেল কলেজত খৰ-খজুৱতি ঔষধ সেৱন কৰি চিকিৎসাধীন হৈ আছে। ফাৰ্মাচিষ্ট গৰাকীৰ এনে কাণ্ডৰ কথা পোহৰলৈ হোৱাত সমগ্ৰ অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে৷